كتب :أحمد يحيى عبدالوهاب

في شهادة إنسانية مؤثرة، روى أحد الناجين من حادث طريق السادات تفاصيل اللحظات الأولى عقب التصادم الذي أودى بحياة عدد من الضحايا، مؤكدًا أن ما عاشه يفوق الوصف.

وقال “عم محمود” أحد الناجين من الحادث الذي أسفر عن وفاة 9 من أبناء قرية طنوب إن المشهد كان صادمًا منذ اللحظة الأولى، مضيفًا: “الدنيا كانت ضلمة، وفجأة صحيت لقيت الجو بقى نهار”

وأوضح أنه لم يستوعب ما حدث في البداية، قبل أن يدرك حجم الكارثة قائلًا:”فوقت لقيت العربيتين في وش بعض، ولقينا نفسنا كلنا فوق بعض”

وأضاف أنه حاول الاطمئنان على من كانوا برفقته، إلا أن الصدمة كانت أكبر مما توقع:

” قعدت أقلب فيهم واحد واحد… لقيتهم كلهم ماتوا، ما عدا واحد بس”

وأشار الناجي إلى طبيعة عمله مع زملائه، موضحًا أنهم كانوا يخرجون للعمل بشكل يومي في أوقات مختلفة، ما بين المساء والفجر، بحثًا عن مصدر رزق بسيط، حيث قال:

“كنا بننزل شغل مع بعض ونرجع الفجر أو الصبح… وكلنا كنا بنشتغل مقابل حوالي 200 جنيه”

وأكد أن الضحايا لم يكونوا مجرد زملاء عمل، بل كانوا أصدقاء مقربين:

“كانوا أصحابي وحبايبي… أكترهم جاري ومتربين سوا، وكنا دايمًا بننزل الشغل سوا”

وتابع بصوت يغلب عليه الحزن:

“لو فوقت كانوا مش عايزين يقولولي إنهم ماتوا… بس أنا كنت عارف”

وأشار إلى أنه طلب الخروج لحضور جنازة أصدقائه، إلا أنه لم يتمكن من اللحاق بها، مضيفًا:

“قولتلهم طلعوني أحضر جنازة أصحابي… لكن ما لحقتش”

واختتم حديثه بكلمات مؤثرة تعكس حجم الفقد:

“كنا بنقسم اللقمة سوا… الإحساس اللي أنا فيه محدش يعرفه، كانوا معايا وبقوا مش معايا… ربنا يرحمهم”