كتبت: دينا خاطر

أدانت محكمة جنايات الجيزة، برئاسة المستشار عفيفي محمود المنوفي، مندوب المبيعات “عماد” – ٣٩ عاماً – بالسجن المؤبد، لاتهامه بقتل عمه وحماه “إبراهيم” طعناً بسكين داخل منزل العائلة بمنطقة بولاق الدكرور، إثر خلاف نشب بينهما على خلفية اتهام المجني عليه لابنة المتهم (٦ سنوات) بسرقة بيضة فراخ من سطح المنزل.

وجاء نص حكاية الجريمة التي هزت بيت العائلة المكون من ثلاثة طوابق، بعد أن تحولت جملة قالها طفل صغير: “يا بابا جدو بيقولي انتي حرامية وسرقتي البيض بتاع الفراخ”، إلى شرارة أطلقت العنان لسنوات من التوتر والخلافات الأسرية المتراكمة.

اعترافات المتهم أمام النيابة.. تفاصيل صادمة

حصلت “الجماهير” على أقوال المتهم في تحقيقات النيابة العامة التي أجراها وكيل النائب العام خالد أبو رحاب، حيث روى “عماد” بتفصيل دقيق ما جرى في يوم الواقعة، وأمام القضاء أكد أن القتل كان “غصب عنه”.

وفي بداية اعترافاته، قال المتهم: “هو اللي حصل إن عمي الله يرحمه كان بيعمل مشاكل ويعتدي لفظياً علينا وكثير المشاكل مع الجيران، ولما كان يعتدي لفظياً علينا في البيت كنت كل مرة بقول عادي ميجراش حاجة ده عمك واخده على قد عقله”.

وأضاف أن الخلافات تطورت مع الوقت بسبب تدخل عمه في حياته الزوجية مع بنته (زوجته الأولى): “ده كان سبب إني اتجوزت واحدة تانية عليها مع إن ده شرع ربنا وأنا ما ظلمتها في حاجة، وكان بيعمل مشاكل علشان إحنا ساكنين مع بعض في نفس البيت”.

ساعات الصدام الأخيرة.. من “بيضة الفراخ” إلى الطعنة القاتلة

واصل المتهم سرده قائلاً: “أنا كنت بحاول أتلافى كل المشاكل دي لحد يوم الواقعة، اتفاجأت ببنتي الصغيرة عندها 6 سنين جاية بتقول لي: الحق يا بابا جدو بيقولي انتي حرامية وسرقتي البيض بتاع الفراخ من فوق السطح، ولو طلعتي فوق تاني أنا هقطعلك أيدك”.

وأضاف: “البنت كانت نازلة بتعيط وخايفة، فأنا طلعت فوق لأبويا بشتكي له من اللي أخوه عمله، وهو ساكن في الشقة اللي في وش شقة أبويا، وأنا ساكن في الدور اللي تحتها”.

وتابع: “لما سمعني طالع واشتكيت لأبويا، لقيت عمي طالع من الشقة وعمال يشتم فيا بألفاظ قبيحة لساني ميقدرش يقولها، فأبويا علشان أخوه الكبير قعد يقولي: ملكش دعوة يا عماد خلاص ده عمك. فأنا حاولت أسكت إلا إني لقيته عمال يشتم فيا وفي أمي بألفاظ وحشة، فاضطررت أشتمه زي ما بيشتمني بأمي”.

مشاجرة دامية وانتهاء بحياة المجني عليه

وقال المتهم: “لقيته دخل جوه على شقته وجاب سنجة كبيرة علشان يضربني بيها، فأنا اضطررت أجيب سكينة من المطبخ من شقة أبويا عشان أحاول أدافع بيها عن نفسي، ومن صوت الزعيق بدأت ناس جيرانا تتلم وتحاول تحوشوه، وفي نفس الوقت بيحاولوا يحوشوني علشان كنا إحنا الاثنين عايزين نمسك في بعض”.

وأضاف: “فإحنا الاثنين فلتنا من الجيران، فلقيته هيخبطني بالسنجة اللي معاه على دماغي، فأنا أتفاجأت وأنا بلوش قدامه بالسكينة راحت دخلت في رقبته، فلقيته وقع في مكانه”.

وتابع المتهم في حالة من الحسرة: “أنا الناس حاشتني ونزلوني تحت البيت، واتفاجأت إن في ناس نازلة من فوق بتقول ده مات، وأنا ساعتها كان هيغمى عليا من الخضة لأني مكنتش أقصد ده أبداً، فهو في الأول والآخر عمي، بس هو بطريقته والتراكمات اللي جوايا بقالي سنين اضطرتني أتعدى عليه علشان أدافع عن نفسي، لكن مكنش قصدي أبدا أقتله”.

أقوال المتهم في التحقيقات.. علاقة متوترة منذ سنوات

كما كشفت التحقيقات عن أن المتهم (عماد) يعمل مندوب مبيعات، ويتزوج من ثلاث سيدات (اثنتان على ذمته وواحدة مطلقة)، ولديه خمس بنات، وجميعهم يقيمون في نفس بيت العائلة، ويحصل على دخل شهري يتراوح بين 15 و20 ألف جنيه.

وعن طبيعة علاقته بالمجني عليه، قال المتهم: “هي العلاقة مش أحسن حاجة ودائماً في ما بينا مشاكل، بسبب حاجات كتيرة أوي، منها إن هو متعارف عليه إنه بتاع مشاكل ودائماً بيختلف مع العيلة كلها، ومنها إن هو كان دائمًا يتدخل في حياتي الزوجية بطريقة كانت بتفسدها وتؤثر عليها بالسلب، ومنها بدأت المشاكل تزيد لما أنا اتجوزت على بنته”.

وأكد المتهم أن والده حاول احتواء الأزمة أكثر من مرة قائلاً له: “معلش يا ابني ده أخويا وده عمك في الأول والآخر”.

الحكم الأخير

بعد نظر القضية برئاسة المستشار عفيفي محمود المنوفي، قضت محكمة جنايات الجيزة بالسجن المؤبد على المتهم “عماد” (مندوب مبيعات) لإدانته بقتل عمه وحماه “إبراهيم” عمداً مع سبق الإصرار، غير أن المحكمة التمسست ظروف الدفاع الشرعي والاستفزاز الشديد، قبل أن تستقر على عقوبة السجن المؤبد.

يذكر أن المجني عليه “إبراهيم” كان والد زوجة المتهم الأولى، كما كان شقيق والد المتهم، أي أنه عمه وحماه في الوقت نفسه.